نم آلود تھے میرے نینا اور سیلاب تھا دل میں اشکوں کا
باہر بھی تھا سیلِ بلا اور سیلاب تھا دل میں اشکوں کا
تھے وہ کیسے عالی ہمت جو اوروں کے غم خوار بنے
خود تھے حزیں وہ حد سے سوا اور سیلاب تھا دل میں اشکوں کا
جب دن میں پھول سے چہرے پر اک قطرہ دیکھا آنسو کا
پھر آخر شب تھی میں تھا اور سیلاب تھا دل میں اشکوں کا
وہ ناؤ جو ڈوبی خستہ تھی اور کشتی بان بھی ناداں تھے
تھے راہی بھی درماندہ اور سیلاب تھا دل میں اشکوں کا
صد حیف ہے ایسے نیتا پر مُسکان تھی جس کے ہونٹوں پر
جب جان بلب تھی جنتا اور سیلاب تھا دل میں اشکوں کا
(م م محمودؔ)
