تو اگر درمیاں نہیں ہوتا
سخت یہ امتحاں نہیں ہوتا
جو ترا ہی نشاں نہیں ہوتا
گل پہ تیرا گماں نہیں ہوتا
تیرے قدموں کی خاک ہو جاتا
قالبِ جسم و جاں نہیں ہوتا
تجھ سے سب کچھ، جو تو نہیں ہوتا
کچھ بھی، اے میری جاں! نہیں ہوتا
جو کروں نذر۔ جسم، جان کہ دل
تیرے شایانِ شاں نہیں ہوتا
بات کرتے ہیں روبرو تجھ سے
جب کوئی درمیاں نہیں ہوتا
ہر جگہ اور ہر زمانے میں
عشق کب اور کہاں نہیں ہوتا
دنیا جو کھینچ لے کرم کا ہاتھ
عرش بھی مہرباں نہیں ہوتا
وصل کی آرزو نہ ہو جس کو
ہجر اس پر گراں نہیں ہوتا
مسکرا تو رہا ہوں محفل میں
پر غمِ دل نہاں نہیں ہوتا
درد اگر دردِ عشق نَے ہوتا
وجہِ تسکینِ جاں نہیں ہوتا
کوئی غم ہوتا نَے کوئی غمگیں
اک دلِ ناتواں نہیں ہوتا
آتشِ عشق میں جلا ہو گا
ورنہ ایسا دھؤاں نہیں ہوتا
لفظ ہرچند آئینے ہیں، مگر
دل میں جو ہے عیاں نہیں ہوتا
چشم بھی بولتی ہے، چہرہ بھی
لفظ ہی ترجماں نہیں ہوتا
(میر انجم پرویز مئی،2008ء۔دمشق)
