ماہِ رمضاں کے بہت ہی مختلف انداز ہیں
رحمتوں اور برکتوں کے ہو رہے آغاز ہیں
آنسوؤں سے جب جلائے جائیں یہ دل کے دئے
شب کی گریہ زاریوں میں مغفرت کے راز ہیں
پھر سے آئے ہیں بڑی ہی شان سے ایام جو
سال کے باقی دنوں سے یہ بہت ممتاز ہیں
تھام کر تقویٰ کو دیویں نفسِ امّارہ کو مات
اَلصّیَامُ جُنَّۃٌ کی اصل یہ اغراض ہیں
دور کر دل کی کدورت عجز کی راہوں پہ چل
خاک میں ملنا ہے گر تو پھر بھلا کیوں ناز ہیں
تیر اور تلوار سے لڑنے کو یکسر چھوڑ کر
جنگ بدیوں سے ہے کرنی گرچہ ہم جانباز ہیں
گر خدا کے واسطے شیطان سے جھگڑیں گے ہم
ڈھال بن جائیں گے روزے کم نہ یہ اعجاز ہیں
اک خدا کے پیار کی دُھن منؔ میں میرے بج اٹھی
مجھ کو اب بھاتے نہیں دوجے کوئی بھی ساز ہیں
(منصورہ فضل منؔ۔قادیان)
