ہوں دُور جگ سے وبائیں سب، بھری محفلوں کا یہ سال ہو
مِٹیں نفرتیں، بڑھیں الفتیں، دلی چاہتوں کا یہ سال ہو
ہوں تِرے کرم کی یاں بارشیں نہ کہیں بھی رنج و ملال ہو
تیرے فضل کے نیچے مالکا تیری برکتوں کا یہ سال ہو
نہ نشان جنگ و جدال ہو، رہے امن و آشتی ہر طرف
ہو زندگی میں سکون و سُکھ مسرتوں کا یہ سال ہو
نہ کدورتیں نہ حسد رہے نہ دل میں بُغض و عناد ہو
ملے ہر کوئی دلی چاہ سے بڑی الفتوں کا یہ سال ہو
کریں جو دعا وہ قبول ہو ہر سمت خیر ہی خیر ہو
ہر ایک دل کو خوشی ملے خوشحالیوں کا یہ سال ہو
نہ جبر کریں یہاں حکمراں ہر ایک چَین سے جی سکے
جو ظلم کی چکی میں پِس گئے، اُن بیکسوں کا یہ سال ہو
سُن التجا تُو منیر کی تُو رحیم ہے تُو کریم ہے
تیری رحمتوں کی گھٹا تلے تیری شفقتوں کا یہ سال ہو
(منیر احمد باجوہ، ہیمبرگ جرمنی)
